لیلیه باید د فکري ودې ځای وي!
دغه څرګندونې د سرحدونو او قبایلو چارو وزارت مسلکي معین ښاغلي محمد آصف ننګ په داسې حال کې، چې د وزارت مالي او اداري لوی ریاست سرپرست ښاغلی حمیدالله بارکزی او یو شمېر رئیسان هم حاضر وو، د وزارت اړوند رحمان بابا لېسې له ښوونکو او اداري چارواکو سره په کتنه کې څرګنده کړه.
په دې کتنه کې یو شمېر ښوونکو، اداري چارواکو او د زده کوونکو استازو د درملو د کمښت، کتابونو، ترمیماتو، نظافت او داسې نورو برخو کې لېسې پورې اړوندې ستونزې شریکې کړې او د حل غوښتنه یې وکړه.
ورپسې ښاغلي محمد آصف ننګ د غونډې ګډونوالو ته د خپلو خبرو په ترڅ کې وویل: لیلیه باید د فکري ودې مرکز وي نه د خوب ځای، ترڅو زده کوونکي له وطن او زده کړې سره مینه ولري او په ارامه توګه خپلو زده کړو ته پاملرنه وکړي.
دغه راز یې په لېسو کې نظم او دسپلین، نظافت، سمسورتیا او د تدریس په کیفت باندې ټینګار وکړ، له استادانو یې وغوښتل، چې د زده کړې کیفیت ته پاملرنه وکړي.
