لوګر کې ۴۰ کلنه کورنۍ دښمني په روغه جوړه بدله شوه
شنبه ۲۷ ربيع الآخر ۱۴۴۸
د لوګر ولایت د محمدآغې ولسوالۍ د ګمران سیمې دوو کورنیو ترمنځ هغه اوږدمهاله دښمني، چې شاوخوا ۴۰ کاله وړاندې په کوزه پښتونخوا کې د هجرت پر مهال رامنځته شوې وه او په ترڅ کې یې د یوه لوري دوه کسان وژل شوي وو د ياد ولايت د سرحدونو، قومونو او قبایلو چارو ریاست د مسؤلينو او قومي مشرانو په هڅو د روغې جوړې له لارې پای ته ورسېده.
د دغې شخړې د حل په موخه لومړی له دواړو لوريو سره خبرې وشوې، وروسته د همدې شخړې د حل لپاره د جوړې شوې کمېټې غړو له لوګر څخه ننګرهار ته سفر وکړ او هلته یې د دواړو کورنیو له استازو سره ګډې ناستې ترسره کړې. د دغو هڅو په پایله کې دواړه لوري لوګر ته راستانه شول او د روغې جوړې بهیر يې په سوله او ورورولي بشپړ شو، چې يو بل يې سره وبښل.
د يادې روغې د مراسمو پرمهال د لوګر مرستيال والي او د سرحدونو، قومونو او قبایلو چارو رئیس د دغې روغې جوړې له ترسره کېدو خوښي څرګنده کړه، د دواړو کورنیو مشرانو ته یې مبارکي وویله او له قومي مخورو او ولسونو یې وغوښتل چې د ورته شخړو د حل، سولې او ورورولي د ټینګښت لپاره خپلو هڅو ته دوام ورکړي.
