قومي مشران، مخور او ځوانان د سولې او ملي یووالي په ټینګښت کې رغنده رول لري!
دغه څرګندونې د سرحدونو او قبایلو چارو وزیر ښاغلي محب الله صمیم نن له غرمې مخکې د بېلابېلو ولایتونو له قومي مشرانو، مخورو او ځوانانو سره د کتنې پر ترڅ کې وکړې.
په دې کتنه کې راغلو مشرانو د سرحدونو او قبایلو چارو د وزیر په توګه د ښاغلي محب الله صمیم د ټاکل کېدو له امله چې په لوړو رایو سره یې د ولسي جرګې د غړو باور ترلاسه کړ مبارکي وویله او د نوموړي هڅې یې د ستاینې وړ وبللې وې ویل: له یاد وزارت سره قومي مشران او مخور هر ډول هلو ځلو او همکاریو ته چمتو دي او خپلې تجربې به د سولې او بیا رغونې په برخو کې په کار واچوي.
ورپسې د سرحدونو او قبایلو چارو وزیر ښاغلي صمیم پخپلو خبرو کي د یادو قومي مشرانو له راتګ څخه مننه وکړه وې ويل: دا مو ایماني او وجداني دنده ده، چې خپلو هېوادوالو لپاره رښتیني خدمتونه ترسره کړو، ځکه چې تاسو قومي مشران، مخور او ځوانان د باعزته سولې او ملي یووالي په ټینګښت کې رغنده رول لرئ، باور مې دادی، چې په ګډه به ستونزو ته د حل لارې چارې پیدا کړو.
