فراه کې له قومونو سره د یووالي او همغږۍ غونډه
رجب المرجب /۱۴
په فراه ولایت کې د سرحدونو، قومونو او قبایلو چارو وزارت له لوري د ولس د ستونزو اوریدلو او قومونو د یووالي په موخه یوه لویه ولسي او قومي غونډه جوړه شوه، چې پکې د یاد وزارت د جرګو او قبایلې چارو معین الحاج ملا عبدالخالق عابد، د پلان او پالیسۍ رئیس مولوي نیک محمد افغان، د فراه ولایت والي او د نورو ادارو پر رئیسانو سربېره د مرکز او ولسوالیو سلګونو دیني عالمانو او قومي مخورو ګډون کړی وو. د غونډې په پیل کې د قومي سپین ږیرو او علماء کرامو له ډلې څو تنو ویناوې وکړې، دوی له ولسونو او قومونو سره د ا.ا.ا همکاري او همغږي وستایله، او ملاتړ ډاډ یې ورکړ، پر دې سربېره یې د خپلو سیمو د برېښنا، لارو او د اوبو د بندونو د جوړولو یو لړ غوښتنې شریکې کړې. ورپسې د جرګو او قبایلي چارو د همغږۍ معین الحاج ملا عبدالخالق عابد غونډې ته وویل: د سرحدونو ق.ق چارو وزارت د خلکو رسا غږ دی.
په هره برخه کې چې خلک ستونزې لري له موږ سره یې شریکوي تر څو ددې وزارت له لورې د حل په موخه اړوندو ارګانونو ته ورسول شي. د غونډې په وروستیو کې د یاد وزارت د پلان او پالیسۍ رئیس مولوي نیک محمد افغاني وویل: د سرحدونو، قومونو او قبایلو چارو وزارت د قومونو د یووالي، د شخړو په حل او د ولس سره د حکومت د واټن د کمولو په برخه کې ډیر کار کړی په وينا يې چې زموږ مسؤليت دی چې ستاسو ستونزې د حکومت له اړوندو ارګانونو سره شریکې کړو او د افغانستان ټول خلک یووالي ته را وبولو. جرګه د هیواد د همیشنۍ آبادي او تلپاتي سوکالۍ په دعا سره پای ته ورسیده.
