زابل کې د قومونو د یووالي لویه ولسي غونډه ترسره شوه.
۱۴۴۴/۲/۱۱
په زابل ولايت کې د سرحدونو قومونو او قبایلو چارو ریاست له لوري د قومونو د يووالي تر نامه لاندي لویه ولسي غونډه تر سره شوه.
یاده غونډه نن په بادام ګل ماڼۍ کې په داسې حال کې تر سره شوه چې پر مهال یې د سرحدونو قومونو او قبائلو چارو سرپرست وزیر الحاج ملا نورالله نوري، ددې وزارت د جرګو معین الحاج ملا عبدالخالق عابد او دولایت د مسؤلینو په شمول سلګونو علماوو، قومي مشرانو او خلکو حضور درلود.
د سرحدونو، قومونو او قبایلو چارو سرپرست ښاغلي نوري وویل: د روسانو د اشغال په خلاف جهاد او د امریکایي اشغال پر ضد د جهاد پیل له زابله وشو او د زابلي ولسونو لپاره دا ویاړ بس دی چې مرحوم امیر المؤمنین یې په خپله غیږه کې څوارلس کاله په خورا میړانه وساته.
ښاغلي نوري ولسونه اتحاد او یووالي ته راوبلل او د اسلامي نظام چي د همدې ولس په قربانیو راغلی د ساتنې او تداوم لپاره یې لاسونه سره ورکړو.
نوري همدا راز زیاته کړه: اسلامي امارت د هیوادوالو د ژوند د سطحې لوړولو، د کار او روزګار موندلو او د هیواد اقتصادي ودې او پرمختګ ته ژمن دی.
قومي مشرانو او علماوو له ښاغلي ملا نورالله نوري سره خپلې یو لړ ستونزې او غوښتنې شریکې کړې.
د غونډې په پای کې قومي مشرانو او علماؤ ته ډالۍ هم ورکول شوې او غونډه د هیواد دښېرازۍ او اسلامي نظام د بقا په دعا پاي ته ورسیده.
