د کوچیانو او کلیوالو ترمنځ د شته خنډونو د حل په برخه کې هلې ځلې
۲۰/۱۲/۱۴۴۵
د سرحدونو، قومونو او قبایلو چارو وزیر الحاج ملا نورالله نوري د بامیانو، غزني، سرپل او میدان وردګو ولایت د اهل تشیع قوم د ستونزو اورېدلو کمیسیون له استازو سره د ناستې پر مهال، د دوی ستونزو ته رسېدنه خپل مسؤلیت وباله او ډاډ یې څرګند کړ چې په یادو ولایتونو کې د شته خنډونو د مخنیوي په موخه به چټکې هلې ځلې کوي. په یاده کتنه کې د اهل تشیع قوم ستونزو ته د رسېدنې کمیسیون څو تنو استازو په میدان وردګ او غزني ولایتونو کې د څو ولسوالیو د کلیوالو او کوچیانو تر منځ د څړځایونو، کرنیزو ځمکو او لویو لارو پر سر د رامنځته شویو اختلافاتو یادونه وکړه او په دغه برخه کې د همکارۍ غوښتنونکې شول. ښاغلي نوري د خپلې وینا پر مهال د هیواد سوکالي، امنیت او پراختیا د الله تعالیﷻ له لوري یوه لویه پیرزوینه وبلله د دې ملت ملاتړ او یووالی یې د نظام د استقرار سبب یاد کړ. نوموړي د یاد کمیسیون د استازو ستونزې واورېدې، د هر اړخیزې همکارۍ او اختلافاتو د حل ډاډ یې څرګند کړ.
