د کندوز ولسونو د سولې مشورتي لویې جرګې له پرېکړو، بین الافغاني خبرو د ملاتړ او اوربند غوښتنه وکړه.
نن چهار شنبه د(تلې۲مه۱۳۹۹) کندوز ولایت د سرحدونو او قبایلو چارو ریاست له لوري جوړې شوې غونډې کې د مرکز او ولسوالیو څخه راغلیو ګڼ شمېر د بېلابېلو قومي شوراګانو مشرانو، قومي مخورو، علمای کرامو، مدني فعالانو او ځوانانو، تر څنګ د کندوز ولایت سرپرست والي نجیب الله عمرخیل، د کندوز ولایتي شورا رئیس محمد یوسف ایوبي، د کندوز علماوو شورا رئیس مولوي محمد عقیل سیرت او د یو شمېر دولتي ادارو رئیسانو ګډون کړی و.
د سرحدونو او قبایلو چارو رئیس نظیف الله نظیف د غونډې ګډونوالو ته د ښه راغلاست او سرحدونو قبایلو چارو محترم وزارت د رهبرۍ پیغام رسولو تر څنګ، په سولې کې د قومي مخورو پر رول خبرې وکړې او زیاته یې کړه، چې، قومي مخور د سولې په برخه کې بنسټیزې پایې دي.
د کندوز سر پرست والي، ولایتي شورا رئیس او د علماوو د شورا رئیس د سولې پروسې په تړاو هر اړخیزې خبرې وکړې، د دولت د سولې له پروسې او بین الافغاني خبرو څخه یې ملاتړ اعلان کړ، بین الافغاني خبرې یې د باثباته او با عزته سولې ته د رسېدو بنسټیزه لار وبلله.
د قومي شوراګانو مشران، قومي مخور، مدني فعالان او ځوانان د غونډې نور ویناوال وو، چې په یوه خوله یې د مشورتي لویې جرګې له پرېکړو، بین الافغاني خبرو ملاتړ او اوربند غوښتنه وکړه او زیاته یې کړه، چې جګړه د حل لار نه ده، په افغان دولت او وسله والو طالبانو یې غږ وکړ، چې ولسونه له جګړې ستړي، سوله غواړي او سولې ته د رسېدو لپاره دې اوربند وکړي.
