د کندوز ولایت له یو شمېر قومي مشرانو سره لیدنه وشوه
یکشنبه/۱۱/ رمضان المبارک/ ۱۴۴۴
د سرحدونو، قومونو او قبایلو چارو سرپرست وزیر الحاج ملا نورالله نوري د کندوز ولایت د خان آباد ولسوالۍ له یو شمېر استازو او قومي مشرانو سره په خپل کاري دفتر وکتل. په دغه ناسته کې یادو قومي مشرانو د کندز ولایت د خان آباد ولسوالۍ یوه له هغو سیمو څخه یاده کړه چې په تېر وخت کې ورته هیڅ ډول پاملرنه نه ده شوې. دوی په خپلو خبرو کې د سرپرست وزیر ښاغلي نوري څخه وغوښتل چې د یادې ولسوالۍ خلکو ته دي د څښاک داوبو، ښوونځیو، مدرسو او سرکونو د رغولو په برخه کې خدمتونه وړاندې شي. وروسته ښاغلي نوري راغلیو قومي مشرانو ته د ښه راغلاست تر ویلو وروسته وویل: کندوز یو له هغو ولایتونو څخه دی چې ولسونو یې د هر اشغال په وړاندې کلکه مبارزه کړې ده او سختۍ یې ګاللې دي. هغه قومي مشرانو ته د ډاډ په ورکولو سره زیاته کړه: دا ستاسو حق و چې موږ ستاسو هر یوه دراوازې ته درغلي وی اوس چې تاسو خپلې غوښتنې ترموږ راوړې دي، زه دا اطمینان درکوم چې ستاسې ستونزې به موږ تر اړوندو ارګانونو رسوو او د حل غوښتنه به یې کوو.
