د ولسمشر له فوق العاده استازي سره کتنه!
د سرحدونو او قبایلو چارو وزیر محترم محمد شفيق ګل آغا شېرزي نن يکشنبې د روان لمريز کال د غوايي د میاشتې په 21 د هېواد د اقتصادي او سوداګريزو چارو د پراختيا او بېوزلۍ راکمولو په برخه کې د جلالتماب جمهور ريس له فوق العاده استازي ښاغلي محمد يوسف غضنفر سره وکتل.
په پیل کې د سرحدونو او قبایلو چارو وزیر ښاغلي شېرزي د اقتصادي او سوداګريزو چارو د پراختيا په برخه کې د ولسمشر د فوق العاده استازي په توګه د ښاغلي غضنفر د ټاکل کېدو له امله د مبارکۍ څرګندولو تر څنګ هيله وښوده، چې ستاسو په هلو ځلو سره به افغانستان له اقتصادي پلوه پرمختګ وکړي او فقر او بې وزلي به کمه شي.
وروسته ښاغلي غضنفر په خپلو خبرو کې د سرحدونو او قبایلو چارو له محترم وزير څخه مننه وکړه او په بېلابېلو برخو کې د هغه کړنې وستايلې.
