د وزارت د اطلاعاتو او عامه اړیکو ریاست له رئيس او کارکوونکو سره کتنه!
د سرحدونو او قبایلو چارو سرپرست او نوماند وزیر ښاغلي محب الله صمیم نن پنجشنبې د روان لمریز کال په ۱۰ مه نېټه په داسې کال کې، چې د وزارت مسلکي معین ښاغلی ډاکټر فریدون بارکزی، د سرحدي څېړنو معین ښاغلی ډاکټر محمد آصف قاضي زاده او د مقام د دفتر رئيس ښاغلی نور آفا ناصري هم حاضر وو، د طلاعاتو او عامه اړیکو ریاست له رئيس او کارکوونکو سر د وزارت د کنفرانسونو په تالار کې وکتل.
په یاده کتنه کې ښاغلي محب الله صمیم لومړی د اطلاعاتو او عامه اړیکو ریاست د خپرنیزو او نورو چارو د څرنګوالي په اړه د اطلاعاتو او عامه اړیکو رئيس هر اړخیز رپوټ واورېده.
ورپسې یو شمېر کارکوونکو د چارو د ښه والي په پار له وزیر صاحب سره خپل وړاندیزونه، ستونزې او لاسته راوړنې شریکې کړې او د غوره خدمتونو د وړاندې کولو په برخه کې د وزارت مقام د همکارۍ هیله وکړه.
ورپسې د سرحدونو او قبایلو چارو سرپرست او نوماند وزیر ښاغلي محب الله صمیم د یاد ریاست کارکوونکي په صداقت او د هېواد لوړو ګټو ته په درناوي، ژمنتیا، ګډ کارکولو او په ډاډ سره د چارو سرته رسولو ته وهڅول وې ویل: باید له فرصت څخه په ګټې اخیستنې خپل هېواد او خلکو ته د رښتیني خدمت جوګه شو.
زیاته یې کړه: چې زموږ خپرونې باید د خلکو په پوهاوي کې مهم رول ولري، ځکه چې پوهاوی د جګړې پر کمېدو هم خپلې اغېزې پرېباسي، ولسونه یووالي ته رابولي او د هېواد ودانۍ ته یې هڅوي.
همدا راز یې د چارو په ترسره کولو کې ددغه ریاست کارکوونکو ته د همکارۍ ډاډ ورکړ او د هر ډول ملاتړ ژمنه یې وکړه.
په پای کې (ستا خبرې ملغلرې) تر عنوان لاندې د پښتونخوا د لیکوال محترم حضرت زبیر زبیر هغه کتاب چې د دغه ریاست له خوا چاپ شوی محترم محب الله صمیم ته ډالې شو.
د یو بل خبر له مخې ښاعلي محب الله صمیم د وزارت د تدارکاتو ریاست له منسوبینو سره وکتل.
په دې کتنه کې د یاد ریاست کارکوونکو د خپلو تېرو او اوسنیو فعالیتونو په ویلو سره د خپلې ادارې یو لړ ستونزې او اړیتاوې شریکې کړې.
ورپسې ښاغلي محب الله صمیم د دوی له کړنو د خوښۍ څرګندولو په ترڅ کې وویل: چې روان مالي کال د پای ته رسېدو په حال کې دی تدارکاتي چارې باید له اړوندو ریاستونو سره په همغږۍ چټکې شي، ترڅو د وزارت عادي او پرمختیا بودجه ولږول شي.
