د وزارت دریو لیسو ته د زده کوونکو د جذب کولو په موخه ازموینه واخیستل شوه
۱۵/۹/۱۴۴۵ هـ ق
د سرحدونو، قونونو او قبایلو چارو وزارت د ښوونې او روزنې ریاست له لوري د یوه پلاوي په مشرۍ په رحمان بابا عالي لیسه کې له څه باندې (۱۰۰۰) تنو زده کوونکو څخه د (رحمان بابا، خوشحال خان او پیر محمد کاکړ) عالي لیسو ته د شاملېدلو په پار ازموینه واخیستل شوه.
د ازموینې په پیل کې د دعوت او ارشاد رئیس الحاج مفتي شفیع الله ثاقب زده کوونکو ته د علم او پوهې په ارزښت خبرې وکړې او د ازموینې اصول یې تشریح کړل. هغه ټولو زده کوونکو ته ډاډ ورکړ چې یاده ازموینه د دوی د حقوق د خوندیتوب په موخه په لاره اچول شوې چې له کبله به یې لایقه زده کوونکې یادو شویو لېسو ته لاره پیدا کړي.
د ښوونې او روزنې د رئیس مولوي عبدالرحمن رحماني په خبره چې ازموینې ته د هیواد له لرې پرتو او محرومو سیمو څخه زده کوونکې راټول شوي چې د دوی د استعدادونو پر اساس به د وزارت اړوند درې ګونو لیسو ته د زده کړو لپاره جذب شي.
د یادونې وړ ده چې د زده کوونکو پایلې به په راتلونکې اوونۍ کې د وزارت له ویب پاڼې نشر او د زده کوونکو درسونه به پیل شي.
