د هېواد د بېلابیلو ولایتونو له یو شمېر کوچې قومي مشرانو سره ناسته ترسره شوه
یکشنبه ۱۹ شوال المکرم ۱۴۴۵
د سرحدونو، قومونو او قبایلو چارو وزارت مسلکي مرستیال مولوي احمد طه قادري د هېواد د بېلابیلو ولایتونو له یو شمېر کوچي قومي مشرانو سره په داسې حال کې ولیدل چې د یاد وزارت د کوچیانو چارو د سمون لوي رئیس ښاغلي ګل زرین کوچي هم حضور درلود.
لومړی کوچي قومي مشرانو په خپلو خبرو کې د فساد د له منځه وړلو، ملي حاکمیت او سرتاسري امینت په برخه کې د ا.ا.ا لاسته راوړنې او همدارنګه د قومونو ترمنځ د شخړو په له منځه وړلو او د دوی په همغږي کولو کې د سرحدونو، قومونو او قبایلو چارو وزارت د ښه مدیریت ستاینه وکړه او دغه راز یې د یو لړ ځایي ستونزو او غوښتنو د شریکولو تر څنګ ټنګار وکړ چې د موسمي تګ را تګ پر مهال دې کوچیانو ته په مېشتو سیمو کې اسانتاوې برابرې شي.
په پای کې مسلکي مرستیال ښاغلي قادري قومي مشرانو او متنفذینو ته د ښه راغلاست تر څنګ ډاډ ورکړ چې د هېواد په کچه د ټولو قومونو ستونزو ته رسېدنه د وزارت په اوسنيو او راتلونکو کاري پلانونو کې ځای لري چې ډېر ژر به ستاسو او نورو قومونو اکثره ستونزو او غوښتنو ته د نورو اړوند ادارو په همکارۍ رسيدګي وشي.
