د نوي تعلیمي کال لپاره د بایزید روښان انستیتیوت د کانکور ازموینه واخستل شوه
د سرحدونو، قومونو او قبایلو چارو وزارت اړوند په بایزید روښان انیستیتیوت کې د نوي تعلیمي کال لپاره د دوولسم ټولګیو له فارغو زده کوونکو څخه د کانکور ازموینه واخیستل شوه. د دغه انستیتیوت د نوم لیکنې پروسه څو ورځې مخکې شروع شوې وه، چې د هیواد له مرکز او مختلفو ولایتونو څخه پکې ۳۵۰ تنو خپل نومونه ثبت کړي وو چې له جملې یې له ۳۰۰ تنو څخه ازموینه واخستل شوه. د ازموینې پر مهال د سرحدونو، قومونو او قبایلو چارو وزارت د ښوونې او روزنې رئیس مولوي عبدالرحمن رحماني، د یاد انستیتیوت آمر مولوي سردار محمد ذاکر او د ازموینې لپاره ټاکل شوي هیئت حضور درلود. د امتحان د پیل پر مهال د ښوونې او روزنې رئیس مولوي رحماني د ازموینې ګډون کوونکي د خپلې عملي کچې لوړولو ته را وبلل او زدکړې یې د هیواد د انکشاف او پرمختګ لپاره مهمې یادې کړې. وروسته د یاد انستیتیوت آمر مولوي ذاکر وویل: دا انستیتیوت د کمپیوترساینس، انجینیري، اقتصاد او زراعت پوهنځۍ لري، چې زموږ د جذب په اساس به مستعد ځوانان د دې ازموینې له لورې ورته بریالي شي او په یادو برخو کې به خپلو زدکړو ته ادامه ورکړي.
