د لغمان ولایت د مرکز او بېلابېلو ولسواليو خلکو ستونزو ته به رسيده ګي وشي!
د لغمان ولایت د مرکز او بېلابېلو ولسوالیو يو شمېر قومي مشرانو او مخورو نن د خپلو ستونزو د هوارولو په موخه د سرحدونو او قبايلو چارو له وزیر ښاغلي محب الله صمیم سره وکتل.
په دې کتنه کې لومړی قومي مشر او مخور حاجي حيات الله خان هوتک د نورو په استازیتوب، د دغه ولايت په ځينو ولسواليو کې په امنيتي او نورو ټولنيزو برخو کې خپلې شته ستونزې له محترم صميم سره شريکې کړې او د وزارت له مشرتابه څخه يې غوښتنه وکړه، چې ستونزې يې د حل په موخه تر اړوندو مقاماتو پورې ورسوي.
ورپسې ښاغلي صميم په خپلو خبرو کې لغمان مهم ولايت او خلک يې په هېواد مين وبلل، چې همېشه يې، د هېواد په پرمختګ، د تلپاتي سولي د ټينګښت او د جمهوري نظام د پايښت لپاره کار کړی دی.
محترم صمیم زياته کړه : د لغمان ولايت امنيت د دولت لپاره لومړيتوب لري او انشاالله اوس يې امنيت د ښه کېدو په لور روان دی، زه تاسو ته ډاډ درکوم، چې ستاسو د ستونزو د هوارولو لپاره به له هېڅ ډول هلوځلو څخه ډډه ونه کړم.
