د قومي شوراګانو له مشرانو او استازو سره کتنه!
د سرحدونو او قبایلو چارو وزیر ښاغلي محب الله صمیم نن سې شنبې د روان لمريز کال د زمري میاشتې پر ۱۹ مه نېټه د قومي شوراګانو له مشرانو او استازو سره د وزارت د کنفرانسونو په تالار کې وکتل.
په یاده غونډه کې د قومي شوراګانو مشرانو او استازو په ټوله کې له افغان ولس څخه غوښتنه وکړه، چې له موجوده نظام څخه خپل ملاتړ وکړي وې ویل: چې قومي شوراګانې او قومونه د سولې د ټینګښت لپاره بهترینه وسیله ده، باید په دې برخه کې قومي شوراګانو ته پاملرنه وشي او د سرحدونو او قبایلو چارو وزارت د امکاناتو له پلوه پیاوړی شئ.
نوموړو د خپلو خبرو په ترڅ کې د قومي شوراګانو د دارالانشاء د فعالیتونو او تشکیلاتو په اړه هم خبرې وکړې ټینګار یې وکړ، چې سوله د ټولو هېوادوالو غوښتنه ده له وسلوالو مخالفینو یې هم وغوښتل، چې اوربند ته لبیک ووایې، ځکه چې د هېواد په ورانولو سره سوله نه شي راتلای او هم به په دې کار سره د افغانانو له غبرګونونو سره مخ شي.
دغه راز یادو قومي مشرانو او استازو خپل نظریات، وړاندیزونه، سلامشورې او د قومي شوراګانو د دارالانشاء پرمختګونه د وزارت له مشرتابه سره شریک کړل.
ورپسې د سرحدونو او قبایلو چارو وزیر ښاغلي محب الله صمیم په خپلو خبرو کې وویل: چې په هېواد کې د تلپاتې سولې د ټینګښت په برخه کې د قومي شوراګانو رول له ارزښته ډک دی، او تاسو تل د خپل موجوده نظام د پایښت لپاره نه ستړې کېدونکې هلې ځلې ترسره کړي او له خپل هېواد او خاورې څخه مو ساتنه کړئ.
دغه راز ښاغلي محب الله صمیم زیاته کړه: دغه نظام د افغانانو په قربانۍ جوړ شوی دی، موږ یې باید ملاتړ وکړو او د ملي ګټو د پیاوړتیا لپاره کار وکړو او هم د قومي شوراګانو له دارالانشاء سره خپلې سلامشورې او وړاندیزو شریک کړو او په ګډه به د هېواد روان وضعیت ښه والي ته د حل لارې چارې پیدا کړو.
