د سهیل ختېځ قومونو د یووالي شورا له مشر سره کتنه!
د سرحدونو او قبایلو چارو وزارت مسلکي مرستیال ښاغلي ډاکتر فریدون بارکزي نن سه شنبې د سلواغې میاشتې پر لومړۍ نېټه د سهیل ختېځ قومونو یووالي شورا له رئیس ښاغلي مین ګل څمکني او ملګرو سره یې د خپل کار په دفتر کې وکتل.
په یاده کتنه کې د قومونو تر منځ په یووالي، د سولې په بهیر کې د قومي مشرانو د ونډې په ارزښت، د قومي شوراګانو تر منځ په همغږۍ او انسجام خبرې وشوې.
ښاغلي بارکزي له قومي مشرانو او قومي شوراګانو سره د وزارت د اړېکو په اړه خبرې وکړې وې ویل:چې له وزارت سره لسګونه شوراګانې ثبت او راجستر دي، د ملي موخو د لاسته راوړلو لپاره په ګډه کار او د هغوی له مشورو څخه ګټه پورته کوو.
ښاغلي مین ګل پخپلو خبرو کې له نظام څخه د ننګې او ملاتړ تر څنګ وویل: چې ژوند پرمخ روان دی، په هره برخه کې بدلونونه او نوښتونه رامنځته شوي دي، جګړه د حل لاره نه ده، موږ ټول د سولې د ټینګښت په برخه کې هاند او هڅو ته چمتو یو باید ټول افغانان په دې برخه کې هڅې وکړو، تر څو زموږ ولس له سوکاله او هوسا ژوند څخه برخمن شي.
