د سرحدونو قومونو او قبایلو چارو وزارت په کندوز ولایت کې ولسي جرګه جوړه کړه
۱۴۴۴/ربیع الثاني ۱۲
یاده جرګه چې د سرحدونو ق.ق چارو د جرګو او قبایلي چارو دهمغږۍ معين الحاج ملا عبدالخالق عابد، د جرګو رئيس الحاج مولوي محمد اسماعیل غزنوي او ورسره مل پلاوي لخوا جوړه شوې وه، د همدې ولایت مرستیال والي حبیب الرحمن صهیب امنیه قمندان عزیزالرحمن بختیار او د ټولو ادارو مسؤلینو حضور درلود.
لومړی د همدې ولایت د سرحدونو ق.ق چارو ریاست رئیس احسان الله ثاقب د اطاعت اړوند خبرې وکړې، همداراز د همدې ولایت په استازولي د حج اوقافو رئیس مولوي ضیاءالحق حنفي حکومت له قومونو او قومونه له حکومت څخه جوړ وبلل، هغه وویل دلته قومونه او حکومت معنوي جوړښت لري، د کندوز خلګ د دې نظام ملاتړ کوي، او د دې نظام لپاره یې قربانۍ ورکړې دي.
ورپسې یوه قومي مشر حبیب الله خان وویل: د کندوز ولایت د ټولو قومونو تر منځ یووالی شته، نوموړي د افغانستان په اړه د رسنیو تبلیغات بې ځایه وبلل، همدا راز یوه بل ګډونوال وویل: په اوس وخت کې زموږ یووالی زموږ دښمنانو ته یو غاښ ماتوونکی ګزار دی باید افغانانو ټول دې ټکي ته په کتو اتحاد او یووالی غوره کړي، دسرحدونو ق.ق چارو وزارت د کوچیانو د اسکانو رئیس مولوی محمد نادر سنګین وویل: د کندوز یو متدین او غیرتي ولس دی، هغه زیاته کړه اوس د قومونو تر مابین د محبت وخت دی او قومي مشران دې خپلو نسلونو ته د یووالي او اتحاد فکر ورکړي.
د سرحدونو قومونو او قبایلو چارو د جرګو رئیس الحاج مولوي محمد اسماعیل غزنوي کندوز یو تاریخي ولایت یاد کړ، نوموړي د اميرالمؤمنين له خوا عمومي عفوه يوه بيساري عمل وباله او هيله يې څرګنده کړه چي، د افغانانو تر منځ د یووالي او اتحاد سبب وګرځي.
د غونډې په اخیر کې د سرحدونو، قومونو او قبایلو چارو وزارت د جرګو او همغږۍ معین الحاج ملا عبدالخالق عابد وویل: دلته که افغانانو اتفاق نه وای کړی هر څه ته به یې خطر وو، افغانانو ډېرې قربانۍ ورکړې دي او د دې تېر شل کلن اشغال د ماتېدو امتیاز د همدې ولس په برخه دی، د سرحدونو، قومونو او قبایلو چارو وزارت هڅه کوي چې د دې ولس د یووالي لپاره هر وخت داسې غونډې جوړې کړي.
