د سرحدونو قومونو او قبایلو چارو وزارت اړوند بایزید روښان انستیتیوت د اقتصاد څانګې محصلینو د پرکتیک دورې د پای ته رسېدو په مناسبت غونډه جوړه شوه.
يکشنبه ١٤٤٤قمري کال د ربيع الاول١٣مه
په یاده غونډه کې چې د سرحدونو، قومونو او قبایلو چارو وزارت د بشري زېرمو ریاست د ظرفیت جوړونې آمریت لخوا جوړه شوې وه پر محصلینو سربېره د سرحدونو، قومونو اوقبایلو چارو وزارت مسلکي معین ښاغلي مولوي عبدالرحمان حقاني، د بشري زېرمو رئیس ښاغلي کريم شاه تیلوي، د کوچیانو چارو د اسکانو رئیس ښاغلي محمد نادر سنګین، د تکنالوجي رئیس ښاغلي خسرو سلام زاده ګډون کړی و.
غونډه د قرآن مجید د څو مبارکو ایتونو په تلاوت پیل شوه ورپسې د بشري زېرمو رئیس ښاغلي تیلوي خبرې وکړې، هغه وویل: علم د الله جل جلاله نعمت دی، قومونه چې عروج پیدا کوي د علم په مټ یې پیدا کوي. الله وایي، تاسې که کفارو ته ماتې ورکوئ نو د علم په وسیله یې ورکړئ..
همدا راز د وزارت مسلکي معین ښاغلي مولوي عبدالرحمان حقاني هم پخپلو خبرو کې د علم او پوهې په ترلاسه کولو ټینګار وکړ، او زیاته یې کړه په هره برخه کې چې مو زده کړې ترلاسه کړې دي هدف باید دا وي چې خپل ځان او الله ج وپېژنو، څه چې الله جل جلاله راته روا کړي دي هغه ترسره کړو اوله کومو اعمالو چې یې منع کړې هغه ونه کړو، خپل معلومات له نورو سره شریک کړو او د خپل هېواد د حفاظت او ترقي لپاره ترې استفاده وکړو.
د غونډه په پاي یادو محصلینو ته چې په مالي، بشري زيرمو، تدارکاتو، او ټکنالوجي برخه کې یې عملي زده کړې پای ته رسولې وې تصدیق پاڼې هم ورکړل شوې.
