د سرحدونو، قومونو او قبایلو چارو وزارت اړوند د بایزید روښان انستیتیوت محصلینو فراغت غونډه
١٤٤٤/٥/٣
د وزارت اړوند بایزید روښان انستیتیوت د کمپیوټر ساینس، زراعت، اقتصاد او انجینرۍ له پوهنځیو څخه د فارغو زده کوونکو د فراغت غونډه ترسره شو. په دې شانداره غونډه کې د بایزید روښان انستیتیوت تدریسي مدیر ښاغلي عارف شاه کټوازي، د رحمان بابا عالي لېسې استاد ښاغلي محمد امین طاهر او د انستیتیوت یو شمېر استادانو په خپلو ویناوو کې لومړی محصلینو ته د دوی د فراغت له امله مبارکي وویله، بیایې د یادو څانګو پر ارزښت رڼا واچوله او محصلین یې د لا نورو زده کړو تر سره کولو ته وهڅول. همدا راز د سرحدونو، قومونو او قبایلو چارو وزارت د تعلیمي مرکزونو د انسجام مدیر ښاغلي زیارمل حمیدي په دې اړه د سرحدونو، قومونو او قبایلو چارو وزارت د سرپرست وزير ښاغلي ملا نورالله نوري د مبارکي پیغام ولوست چې محصلین یې د ټولنې په وړاندې خپلو راتلونکو مسؤلیتونو ته متوجه کړي وو او د فراغت مبارکي یې ورته ویلې وه. د غونډې په وروستیو کې پرمحصلینو تصدیق لیکونه هم وویشل شول.
