د زابل ولایت د شاجوی ولسوالي قومي مخورو د سرحدونو، قومونو او قبایلو چارو له وزیر سره وکتل
دوشنبه ۱۴۴۷ ربیع الاول ۸
نن په کابل کې د زابل ولایت له شاجوی ولسوالي څخه راغلیو علماوو او قومي سپين ږیرو د اسلامي امارت د سرحدونو، قومونو او قبایلو چارو له وزیر الحاج ملا نورالله نوري سره وکتل، په دې کتنه کې د یادې ولسوالي علماوو او سپین ږیرو د اسلامي امارت په اړه وویل چې په دې نظام کې یوازې د انسانانو نه، بلکې د حیواناتو حقوق هم خوندي دي، دوی د خپلو خبرو پر مهال په سیمه کې د اوبو د کمښت، د مدارسو د جوړېدو او دا راز یو لړ نورې ستونزې شریکې کړې.
په پای کې د هېواد د سرحدونو، قومونو او قبایلو چارو وزیر ښاغلي نوري راغلیو قومي سپین ږیرو ته تر ښه راغلاست وروسته وویل، د افغانستان ولسونو د اسلامي نظام د اقامې لپاره قربانۍ ورکړې دي، دا زموږ وجیبه ده چې اسانتیاوې ورته برابرې کړو او خدمت یې وکړو، نوموړي قومي سپین ږیرو ته ډاډ ورکړ، چې د دوی ستونزې به د هوارولو په منظور له لوړو مقاماتو سره شریکوي.
