د رحمان بابا له عالي لېسې او بایزید روښان انسټیټوټ څخه لیدنه!
د سرحدونو او قبایلو چارو وزارت مسلکي معین ښاغلي محمد آصف ننګ نن له غرمې مخکې د وزارت اړوند رحمان بابا له عالي لېسې او بایزید روښان انسټیټوټ له اداري، تدریسي، لیلیه خونې او پخلنځي چارو څخه لیدنه وکړه او د زده کوونکو ستونزې یې له نږدې واورېدې.
ښاغلي ننګ د یادې لېسې څخه د لیدنې په ترڅ کې د زده کوونکو د تدریسي او اداري چارو په چټکتیا او سمون ټینګار وکړ وې ویل: زموږ هڅه به دا وي، چې د وزارت اړوندو تعلمي مرکزونو کې زده کوونکو ته ښه چاپیریال رامنځته او د دوی ستونزو ته پر وخت رسېدنه وکړو، ځکه چې دوی د لرې پرتو او ناامنو سیمو څخه راغلي او دلته خپلې زده کړې ترسره کوي.
د سرحدونو او قبایلو چارو وزارت مسلکي معین د زده کوونکو د لیلیه او پخلنځي خونو څخه د لیدنې ترڅنګ د زده کوونکو د ازموینو بهیر هم وکوت او خوشالي یې څرګنده کړه، چې د ازموینې بهیر په شفافه او مناسبه فضا کې ترسره کیږي.
دغه راز د وزارت اړوندو مسؤلینو ته یې د چارو د ښه والي په موخه لازمې لارښوونې وکړې.
