د خوست ولایت د ځاځي میدان ولسوالۍ قومي سپین ږیرو سره لیدنه
۲۶/۱۱/۱۴۴۵
د خوست ولایت د ځاځي میدان ولسوالۍ قومي سپین ږیرو د سرحدونو، قومونو او قبایلو چارو له وزیر الحاج ملا نورالله نوري سره، خوست ته د نوموړي د سفر پر مهال وکتل. یاده کتنه چې د خوست ولایت د سرحدونو، قومونو او قبایلو چارو ریاست په انګړ کې رامنځته شوې وه، پر مهال یې د ځاځي میدان ولسوالۍ قومي مخورو د سرحدونو، قومونو او قبایلو چارو وزیر ښاغلي نوري ته د ډېورنډ فرضي کرښې شاوخوا سیمو د ستونزو او یو لړ نورو موضوعاتو په اړه خبرې وکړې.
دوی د ډېورنډ فرضي کرښې په اوږدو کې وخت نا وخت د رامنځته کېدونکو ستونزو په اړه د کُرمې ایجنسۍ له قومي سپین ږیرو سره د لیدنې راپور وړاندې کړ، د یادو ستونزو د حل غوښتنه یې وکړه او له خپلې خاروې څخه د دفاع او ساتنې په اړه یې د یاد وزارت سرپرست ته ډاډ ورکړ.
وروسته د سرحدونو، قومونو او قبایلو چارو وزیر الحاج ملا نوري وویل: په افغانستان کې اوس داسې حکومت حاکم دی چې خپل حقوق او ارضي تمامیت تر هر چا ښه پېژني، نوموړي د ډېورنډ فرضي کرښې په اړه زیاته کړه: د پاکستان لخوا د ډېورنډ فرضي کرښې په اوږدو کې د رامنځته کېدونکو ستونزو په اړه ا.ا.ا جدي غور کوي، ښاغلي نوري د ولسي او سیمه ییزو ستونزو په اړه په خپلو خبرو کې وویل: موږ ستاسې ولسي او سیمه ییزې ستونزې د حل په موخه له ذی دخله ارګانونو سره شریکوو او د هوارولو هڅه یې کوو.
