د جندر د تساوې او د ښځو د مشارکت د زیاتوالي پالېسۍ په اړه د دوه ورځني ورکشاپ جوړېدل!
د سرحدونو او قبایلو چارو وزارت د جندر واحد آمریت نن د روان لمریز کال د وري میاشتې پر ۲۱ مه نېټه د جندر د تساوې او د ښځو د مشارکت د زیاتوالي پالېسۍ په اړه دوه ورځنی روزنیز ورکشاپ جوړ کړ، چې پکې د وزارت د جرګو او قبایلو چارو د همغږۍ معین ښاغلي الحاج محمد یعقوب احمدزي او یو شمېر ښځینه کارکوونکو برخه اخیستې وه.
د ورکشاپ په پیل کې ښاغلي الحاج محمد یعقوب احمدزي په ادارو کې د ښځو ونډه مهمه وبلله وې ویل: باید ښځو ته زیات فرصت ورکړل شي، ترڅو خپلو حقوقو ته رسیده ګي وکړي.
دغه راز ښاغلي احمدزي زیاته کړه، وزارت په پام کې لري، چې د ښځو د مشارکت د زیاتوالي پالېسۍ او د جندر د تساوی برابري په خپلو اړوندو برخو تطبیق کړي او ښځو ته په لوړو او ټیټو بستونو کې د ازادو سیالیو له لارې زیاته ونډه ورکړي، ترڅو د دوی موجودیت د وزارت په تشکیلاتی جوړښت کې محسوس شي.
دغه راز د جندر واحد آمرې اغلې خاطرې حیات په وزارت کې د ښځو په مانا لرونکي حضور باندې د ټینګار په ترڅ کې وویل: یاد آمریت هڅه کوي، چې دغه پالیسي د اداري اصلاحاتو او ملکي خدمتونو د خپلواک کمېسیون سره سمه تطبیق کړي، ترڅو ښځې په ادارو کې خپل واقعي ځای ولري.
