د ترانسپورټ نوي عمومي مدير په کار پيل وکړ
چهارشنبه ١٤٠١لمريزکال دغويې٢٨
د سرحدونو، قومونو او قبايلو چارو وزارت د ترانسپورټ نوي مدير ښاغلي عبدالوارث اخندزاده، چې د بشري زيرمو رياست په وړانديز او د وزارت عالي مقام په منظورۍ ددغه وزارت د ترانسپورت عمومي مدير په توگه ټاکل شوی دى د يوې غونډې په ترځ کې معرفي او په کار يې پيل وکړ.
په یاده غونډه کې د سرحدونو ، قومونو او قبایلو چارو وزارت د بشري زيرمو رئيس ښاغلی کريم شاه تيلوي ، دتشريفاتو رئيس مولوي عيدمحمد، د تدارکاتو رئيس محترم سيد امين اغا، د معلوماتي ټکنالوژۍ رئيس خسرو سلام زاده ، مالي او اداري رئيس ښاغلی سليم ستانکزي او ګڼ شمېر کارکونکو ګډون کړی وو.
په پيل کې د بشري زیرمو رئیس ښاغلي کريم شاه تيلوي د ترانسپورټ عمومي مدير په توګه د ښاغلي عبدالوارث اخندزاده د ټاکل کيدو د مبارکۍ تر څنګ په نوې دنده کې ورته د بریالیتوب هیله وکړه وې ویل: چې د ترانسپورټ عمومي مديريت یو کلیدي مديريت دی چې ستاسو په راتگ سره به انشاالله په روانو چارو کې ښه والی راشي.
نوي مدير ښاغلي اخندزاده هم په خپلو خبرو کې د وزارت مشرتابه له باور او اعتماد څخه مننه وکړه، ژمنه یې وکړه، چې خپله دنده به په صداقت او ایماندارۍ د خپلو مشرانو په مشوره سره سم پر مخ وړي.
ورپسې د وزارت تدارکاتو رئيس سيد امين اغا هم پخپله وینا کې وویل: چې باید د اسلامي امارت په تفکر او روحیې سره دوزارت د پرمختګ لپاره کار وکړو او د کار پایله مو باید په چارو کې مثبت بدلون او تحول وي.
