د تخار ولایت د همغږو ځوانانو شورا له رئیس او غړو سره کتنه!
۱۳۹۹/۱۱/۱۹
د سرحدونو او قبایلو چارو وزیر ښاغلي محب الله صمیم نن له غرمې وروسته د تخار ولایت د همغږو ځوانانو شورا له رئیس ښاغلي انجینر ذبیح الله ابراهیمي او غړو سره د خپل کار په دفتر کې وکتل.
په دې کتنې کې ښاغلي ابراهیمي د یادې شورا د فعالیتونو په اړه د معلوماتو وړاندې کولو ترڅنګ د سرحدونو لو قبایلو چارو وزیر ښاغلی محب الله صمیم یو ملي فکر لرونکی شخصیت یاد کړ، وې ویل: موږ د یو ټولینز بنسټ په توګه هیڅ کله ملي ګټې تر شخصي ګټو غوره نه بولو او د خپل هېواد د آبادې او سوکالي لپاره هلې ځلې ترسره کوو، چې د همدې شورا له لارې د ځوانانو د زده کړې د کچې لوړولو، د ملي روحیې پياوړي کولو، د ټولنیزو او فرهنګي اړیکو د پیاوړتیا لپاره کار کوو.
دغه راز نوموړو له وزارت سره د خپلو همکاریو ډاډ څرګندولو په ترڅ کې وویل: چې اساسي موخه مو په هېواد کې د پوه او مجربو ځوانانو روزل دي، چې له دې لارې به خپل هېواد او خلکو لپاره د خدمت مصدر وګرځي.
ورپسې ښاغلي محب الله صمیم خبرې وکړې وې ویل: خوښ یم، چې په تخار ولایت کې د تاسو په شان ځوان کدرونه شتون لري، چې د ملي فکر له لارې د هېواد د پرمختګ لپاره هاند او هڅې کوي، نن ورځ مو هېواد له هرڅه نه مخکې ملي یووالي ته اړتیا لري، چې تاسو ځوانان په دې برخه کې ارزښتناک رول لوبول شې.
دغه راز ښاغلي صمیم زیاته کړه: موږ ولایتي سفرونه پیل کړي، چې انشاالله تخار ولایت ته هم رسمي سفر لرو، ترڅو د قومي مشرانو، دیني عالمانو، مخورو، ځوانانو او خویندو وروڼو وړاندیزو او نظریات راټول او د جلالتماب رئيس جمهور تر میز یې ورسوو.
