د تخار ولایت د مرکز له یو شمېر قومي مشرانو سره ناسته وشوه
۲۳/شوال المکرم/۱۴۴۴
د تخار ولایت د سرحدونو، قومونو قبایلو چارو رئیس مولوي احمدالله تالقاني د یاد ولایت د شیخ محمد روحاني سیمې له یو شمېر قومي مشرانو سره د همغږۍ او یووالي په موخه په خپل کاري دفتر کې وکتل. د ناستې په پیل کې د یاد ریاست رئیس ښاغلي تالقاني راغلیو قومونو ته ښه راغلاست ووایه او زیاته یې کړه: د هیواد د قومونو تر منځ هيڅ ډول توپیر نشته، د اسلام له نظره هم غوره هغه څوک دي چې تقوا ولري. نوموړي د ا.ا.ا د ټولو قومونو ګډ کور یاد کړ او راغلي قومونه یې یووالي او همغږۍ ته را وبلل. هغه د قومونو ستونزې او غوښتنې اورېدل خپله دنده یاده کړه او د هغوی د ستونزو د حل ژمنه یې وکړه. په پای کې د راغلیو مشرانو په استازیتوب یوه تن قومي مشر د قومونو د ستونزو او یووالي په اړه خبرې وکړې، د حکومت ملاتړ کول یې د ولس دنده وبلله او د یاد ریاست څخه یې مننه وکړه چې د خلکو ستونزې اورې او د قومونو د یووالي لپاره کار کوي.
