د بندرونو نوي رئیس په دنده پیل وکړ
۱/۲/۱۴۴۵
مفتي محمد امین همدرد د سرحدونو، قومونو او قبایلو چارو وزارت د سرحدي پلټنو د معینیت اړوند د سرحدي بندرونو د همغږۍ د نوي رئیس په توګه د یاد وزارت رئیسانو او کارکوونکو ته د یوې ناستې په ترڅ کې ور وپېژندل شو. په یادو مراسمو کې د سرحدي پلټنو معین مولوي محمد اسماعیل غزنوي وویل: د سرحدي بندرونو د همغږۍ ریاست د دغه وزارت په تشکیل کې نوی جوړ شوی ریاست دی چې د هیواد د ټولو بندرونو د څارنې، حفاظت او ساتنې دنده به په غاړه لري. هغه زیاته کړه: بندرونه د یوه کور د دروازو مثال لري که چېرته د یوه کور دروازې محفوظې وې ټول هیواد به امن وي. ښاغلي غزنوي د ټاکل شوي رئیس مفتي همدرد په اړه وویل چې نوموړی یو تقواداره، په کار بلد او مجاهد کس دی. هغه هیله څرګنده کړه چې نوی ټاکل شوی رئیس به د بندرونو د حفاظت په برخه کې خپله دنده په ښه توګه ترسره کړي او په چارو کې یې ورته د بریالیتوب غوښتنه وکړه. په پای کې د ټولو مسؤلینو او کارکوونکو له لوري ټاکل شوی رئیس ته په چارو کې د بریالیتوب او توفیق غوښتنه وکړه.
