د بغلان ولايت د احمدزيو کوچيانو له ځينو مشرانو سره کتنه.
۱۴۴۴/۴/۱۸ يکشنبه
د سرحدونو، قومونو او قبایلو چارو سرپرست وزير الحاج ملا نورالله نوري نن له غرمې مخکې د وزارت د غونډو په تالار کې د بغلان ولايت د ډنډ غوري له کوچي مشرانو سره په داسې حال کې وکتل چې پر مهال یې د کوچيانو چارو د سمون لوی رياست رئيس مولوي ګل زرين کوچي او د اطلاعاتو او عامه اړيکو رئيس ملا حمدالله فطرت هم حضور درلود.
د کوچيانو ځينو مشرانو لکه حاجي رستم خان، حاجي سرور، تاج محمد، عبدالحی، جمعه دين او سراج الدين د سرحدونو، قومونو او قبایلو چارو سرپرست وزير ته د اعزاز دوډيزه پګړۍ ور په سر کړه، د کوچي مشرانو په نماينده ګي ښاغلي حاجي رستم خان د بغلان ولايت د کوچيانو د مالدارۍ، څړځايونو او هستوګنې اړوند ځيني ستونزې او وړانديزونه شريک کړل.
د سرحدونو، ق.ق چارو سرپرست ښاغلي نوري مشرانو ته ښه راغلاست ووايه او زياته يې کړه چې د کوچيانو ژوند او مالدارۍ ته به په راتلونکي کې په لوړه کچه رسيدګي کيږي، په وينا يې مالداري د هيواد د اقتصاد مهمه برخه ده او په ټوله کې مسؤولين دې ټکي ته متوجه دي، ښاغلي نوري د بغلان ولايت د کوچيانو ستونزې اوريدل خپله دنده وبلله او ډاډ يې ورکړ چي په راتلونکي کې به هم د دوئ هرې غوښتنې ته ځواب ووايي.
