د بدخشان ولایت مرکز فیض آباد ښار د ناحیو شورا د مشر او غړو ستونزې او غوښتنې واورېدل شوې!
د سرحدونو او قبایلو چارو وزیر ښاغلي محب الله صمیم نن مازدیګر بدخشان ولایت ته د خپل سفر په لومړۍ ورځ د دغه ولایت د فیض آباد ښار د ناحیو شورا د مشر ښاغلي ډاکټر صاحب وکیل او غړو ستونزې او غوښتنې له نږدې واورېدې.
په دې کتنه کې لومړی یادو مشرانو بدخشان ولایت ته د سرحدونو او قبایلو چارو وزیر د سفر هر کلی وکړ او د موجوده نظام د ملاتړ په ترڅ کې یې خپلې یو لړ سیمه ییزې ستونزې د وزارت له مشرتابه سره شریکې او په حل لارو یې ټینګار وکړ.
ورپسې ښاغلي محب الله صمیم بدخشان ولایت ته د خپل رسمي سفر د موخه په اړه معلومات وړاندې کړل او یادو مشرانو ته یې ډاډ ورکړ، چې ستونزې، وړاندیزونه، غوښتنې او سلامشورې یې به یې د حل په موخه له اړوندو مقاماتو سره شریکې کړي.
دغه راز ښاغلي محب الله صمیم د یادو مشرانو وغوښتل، چې د خپل موجوده نظام او ملي امنیتي ـ دفاعي ځواکونو ملاتړ وکړي او هم په دې برخه کې ولسونو وهڅوي او دخلکو د ذهنیتونو په جوړولو کار وکړي.
