بلخ کې د مسؤلينو په هڅو دوه کلنې دښمني پای وموند
پنجشنبه ۲ محرم الحرام ۱۴۴۸
د بلخ ولايت د سرحدونو، قومونو او قبايلو چارو رياست په هڅو د دولت آباد ولسوالي اړوند د دوو کورنيو تر منځ هغه دوه کلنه دښمني، چې د خپلمنځي اختلافاتو له امله رامنځته شوې وه او ګڼې ستونزې يې را ولاړې کړې وې، د يوې قومي جرګې له لارې په سوله ييز ډول پای ته ورسېده.
د يادې جوړې شوې جرګې پرمهال د بلخ ولايت د سرحدونو، قومونو او قبايلو چارو رياست مسؤلينو د خلکو ترمنځ دغوره ژوند په تړاو د اسلام په رڼا کې هر اړخېزه وینا وکړه او عفوه او بښنه کول يې د مسلمانانو کار ياد کړ. دوی همداراز په ولسونو غږ وکړ، چې ستونزې دې د خبرو له لارې هوارې کړي.
په پای کې د جرګې غړو د شرعي فيصلې له مخې د دواړو لوريو په رضايت پرېکړه وکړه او ياده د دوه کالو دوامداره دښمني يې په دوستي بدله کړه، چې په همدې سره د ښکېلو کورنيو مشرانو يو بل سره ومنل او نوی د خوښي ژوند يې پيل کړ.
