اسلامي امارت لمر دی چې پر ولس راختلی دی
له غور ولایت څخه راغلیو کوچي مشرانو د سرحدونو، قومونو او قبایلو چارو وزارت اړوند له مسلکي معین مولوي احمد طه قادري سره د هغه په کاري دفتر کې وکتل. په دغه کتنه کې د یاد ولایت د مرکز مېشتو کوچي مشرانو په نمایندګي څو تنو خبرې وکړې او د غور په مرکز کې یې د کوچي قشر او ځایي اوسېدونکو تر منځ د څړځایونو او مېنو پر سر د اختلافاتو یادونه وکړه، دوی وویل: پر یادو ځمکو باندې له ډېرې مودې راهیسې شخړې روانې دي، حکومت دې د دوی د ستونزو د حل په برخه کې غور وکړي، دوی وویل: په تېر دور کې موږ ډېر ځورول شوي یو، ا.ا.ا یو لمر دی چې د افغانستان پر ولس را ختلی او موږ هیله من یو چې په اسلامي نظام کې د هیڅ چا حق نه خوړل کیږي. راغلیو مشرانو د دوی د ستونزو په برخه کې د جدي پاملرنې غوښتنه وکړه. ورپسې د وزارت مسلکي معین ښاغلي قادري د دوی له راتګ څخه خوښي وښوده او دا یې د شکر ځای یاد کړ چې خلک حکومت ته د ستونزو د حل لپاره مراجعه کوي، هغه وویل: دا نظام د ولس په هڅو او سرښندونو راغلی دی او د ولس لپاره په پوره اخلاص سره کار کوي. نوموړي د مشرانو د ستونزو په تړاو وویل: دا وزارت د هیواد د ټولو قومونو ګډ کور دی او زه ډاډ درکوم چې ستاسې ستونزې به له مسؤلینو سره شریکوو او په اړه به یې جدي اقدام کوو.
