په هيواد کې د مسؤلينو او ولسي خلکو ترمنځ د ملت، اتحاد، اسلامي نظام بقاء او ولس هوساينې غونډو دوام
پنجشنبه ۱۸ جمادی الأولی ۱۴۴۷
د سرحدونو، قومونو او قبایلو چارو وزارت له لوري داځل په نورستان ولايت کې له خلکو سره د ياد وزارت د جرګو او قبایلو چارو د همغږۍ د معین په مشري د مل پلاوي په شتون کې د ملت، اتحاد، اسلامي نظام بقاء او ولس هوساینې تر عنوان لاندې ولسي غونده وشوه، چې پر مهال یې د ولایتي ادارو مسؤلینو او ولسواليو استازو په ګډون، قومي مشرانو، ديني عالمانو، سپین ږیرو او ځوانانو هم برخه لرله.
قومي مشرانو د غونډې پر مهال ټينګار وکړ، چې په خلکو کې د قوم پرستي جرړې باید ختمې شي، ځکه دا د حق او باطل ترمنځ د توپير فضاء کمزورې کوي او د ملت د يووالي پر وړاندې خنډ جوړوي. قومي مشرانو زياته کړه، چې نورستان ولايت ته د ا.ا.ا د مشرانو پام زيات شوی او هڅې روانې دي تر څو د ولس ستونزې حل او اړينو خدمتونو ته د خلکو لاسرسی لا ښه شي. دوی همداراز د خپلو سيمه ييزو ستونزو د يادونې ترڅنګ د اسلامي امارت پر کلک ملاتړ هم ټينګار وکړ.
ورپسې د جرګو او قبايلي چارو د همغږۍ معین ښاغلي احمد وویل :ولسونه باید د دښمن پر وړاندې یو موټی، بیدار او هوښیار پاتې شي، څو د هغوی ټول شرارتونه او ورانکاره پلانونه شنډ او د هيواد ثبات خوندي وساتل شي. نوموړي خلکو ته ډاډ ورکړ، چې په وينا يې د اسلامي امارت مشران شپه او ورځ ستاسو د خدمت او ملاتړ لپاره چمتو دي. ښاغلي احمد وويل: د نورستان ولس د خپل ایمان، مېړانې او وفادارۍ په برکت سترې قربانۍ ورکړې، د هرې ویاړلې لحظې یاد یې د دې سیمې د زړورو خلکو د بې ساري غیرت او خدمت څرګند ثبوت دی.
په پای کې د وزارت د اقتصادي خدمتونو او څړځايو نو رئیس مفتي لعل محمد منیب په خپلو خبرو کې وويل: ټول ولسونه باید یو تن او یو وجود وي او هېڅ ډول توپیر باید ونه لري. نوموړي زياته کړه، چې تېرو حکومتونو د خلکو ترمنځ ویش او بېلتونونه رامنځته کړي وو، چې له امله یې د ملت یووالي ته زیان اوښتی او د اختلافاتو له وجې د هيواد د پرمختګ مخه نېول شوې وه.
