له قومي مشرانو سره کتنه!
د سرحدونو او قبایلو چارو وزارت مسلکي مرستیال ښاغلي ډاکټر فریدون بارکزی نن چهارشنبې د ۱۳۹۸ لمریز کال د لړم میاشتې په ۸ مه نېټه د شیخ محمد روحاني قوم د سرتاسري شورا له بنسټ ګر ښاغلي ډاکټر محمد هاشم وهاج او ملګرو سره د خپل کار په دفتر کې وکتل.
په دې کتنه کې، چې د اطلاعاتو او عامه اړیکو رئيس ښاغلی عبدالوحید خاورې هم حاضر وو، د یادې شورا مشر په خپلو خبرو کې وویل: د سولې، ملي یووالي او د امنیت د ټینګښت په برخه کې د قومي مشرانو او دیني عالمانو سره سلا مشورې اړینې او مهم رول لري، چې باید د دوی نظرونه او وړاندیزونه واوریدل شي، ترڅو د سولې پروسه په بریالۍ توګه مخته ولاړه شي.
همدا راز ښاغلي وهاج زیاته کړه، چې د سرحدونو او قبایلو چارو وزارت له مشرتابه څخه مننه کوو، چې تل یې د قومي شوراګانو د انسجام په برخه کې یې نه ستړې کیدونکې هلې ځلې ترسره کړي دي او د دې ترڅنګ د خپل موجوده نظام ملاتړ کوو.
ورپسې د سرحدونو او قبایلو چارو وزارت مسلکي مرستیال ښاغلي ډاکټر فریدون بارکزي پخپلو خبرو کې د یادو قومي مشرانو ستونزې پر ځای وبللې وې ویل: ستاسو درنو مشرانو له نیکو نظرونو څخه منندوی یو، تاسو تل د خپل هېواد او خلکو لپاره ریښتینې هڅې ترسره کړي. د سولې د ټینګښت په برخه کې باید له قومي مشرانو او دیني عالمانو سره سلامشورې ترسره شي، ترڅو د یوې بین الافغاني سولې څخه برخمن شو.
