د سرحدونو، قومونو او قبايلو چارو وزارت تر چتر لاندې په ميدان وردګ ولايت کې یو باب روغتیایي کلینیک جوړ او ګټې اخېستنې ته وسپارل شو.
سه شنبه ۳۰ ذوالحجة الحرام ۱۴۴۷
د میدان وردګو ولایت د جلریز ولسوالۍ په تکانه سیمه کې د دغه ولايت د سرحدونو قومونو او قبایلو چارو آمریت له لوري د ماشومانو د ملاتړ مؤسسې په همکاری یو باب روغتیایي مرکز له ټولو ملحقاتو سره د شپږ میاشتو په موده کې د څه باندي یو لک امریکایي ډالرو په ارزښت جوړ او د مسؤلینو له لوري د یوي غونډې په ترڅ کې ګټې اخیستنې ته وسپارل شو.
په یاده جوړه شوې غونډه کې د میدان وردګو ولایت والي الحاج ملا خیرالله خیرخواه، د سرحدونو قومونو او قبایلو چارو وزارت د سرحدي چارو مشاور مولوي محمد امین همدرد، د سرحدي پلټنو رئیس مفتي فیض محمد فیضي، د جلرېز ولسوالۍ ولسوال، د میدان وردګو ولایت د سرحدونو قومونو او قبایلو چارو آمر او ګڼ شمېر سیمه ییزو مسؤلینو، قومي مشرانو او دیني عالمانو ګډون کړی وو.
غونډې ته مسؤلينو په خپلو خبرو کې د ياد روغتيايي کلينيک پر فعاليت خوښي وښوده او دغه کلینیک يې په ياده سيمه کې د ناروغانو د صحي ستونزو د هواري او د ناروغانو د درملنې او مشورې مناسب ادرس ياد کړ. يادو مسؤلينو د ماشومانو د ملاتړ مؤسسې څخه هم مننه وکړه، چې په وينا يې د یاد وزارت سره په تفاهم په بلخ، ننکرهار، کندز او میدان وردګو ولایتونو کې د صحت، زراعت، مالدارۍ او انکشاف په برخو کې ولسونو ته لازم خدمات وړاندې کوي.
