خوست کې د مسؤلينو له لوري دوه جلا شوې کورنۍ بېرته سره پخلا شوې
چهار شنبه ۱۹جمادی الآخرة ۱۴۴۷ د ياد ولايت د سرحدونو، قومونو او قبایلو چارو رياست مسؤلينو په دغه ولايت کې د دوو کورنيو ترمنځ هغه مرګونې شخړه په سوله ييزه توګه حل کړه، چې په ترڅ کې يې يو تن وژل شوی و او ګڼې کورنۍ ستونزې يې را ولاړې کړې وې. دغه شخړه، چې څه موده وړاندې د خوست ولايت مرکز متون اړوند د کونډيو صحرا په کلي کې رامنځته شوې وه د اسلامي امارت د مسؤلينو په هلو ځلو پای ته ورسېده او ښکېلو لوريو يو ځل بيا د ورورولي ژوند پيل کړ. په پای کې د دواړو کورنيو مشرانو د خوښي په څرګندولو سره ژمنه وکړه، چې په راتلونکي کې به هېڅ ډول جګړې، دښمنۍ او تاوتريخوالي ته زړه ښه نه کړي. بلکي په سوله او اتحاد کې به ژوند ته دوام ورکوي.
