د کابل ولايت د سروبي ولسوالي له يو شمېر قومي مشرانو سره ليدنه
سه شنبه ۲۸ ربيع الثاني ۱۴۴۷
د سرحدونو، قومونو او قبایلو چارو وزارت د جرګو او قبايلي چارو د همغږۍ معين الحاج مولوي محمد علي جان احمد د شخړو د حل کمېټې د غړو په شتون کې نن له غرمې وړاندې د کابل ولايت د سروبي ولسوالي د تور غر سيمې له يو شمېر قومي مخورو، علماوو او ځوانانو سره د ځينو سیمه ییزو ستونزو د حل په موخه ناسته ترسره کړه.
په دغه ناسته کې راغلیو مشرانو د قومونو د یووالي او اتفاق په اړه د اسلامي امارت هڅې وستایلې او د شخړو د حل په برخه کې یې د سرحدونو، قومونو او قبایلو چارو وزارت هلې ځلې د پام وړ وبللې. دوی د پلازمېنې کابل په سروبي ولسوالي کې د ځايي ستونزو یادونه وکړه او د حل په برخه کې یې د مسؤلینو د پاملرنې او کلکې همکاري غوښتنه وکړه.
ښاغلي احمد قومي مخورو ته له ښه راغلاست وروسته وويل: دا نظام د ولسونو خدمت ته ژمن دی، د ټولو قومونو حقونه پکې خوندي دي، موږ مکلف يو چې ستونزو ته مو د حل لارې ولټوو. نوموړي راغليو قومي مشرانو ته ډاډ ورکړ، چې د ياد وزارت د يوه ګډ پلاوي په حضور کې به سيمي ته ولاړ شي او د دوی د ستونزو د حل په موخه به ممکنه عملي ګامونه واخلي.
