د کوچیانو لپاره د تابعیت تذکرو د وېش د ستونزو د حل په اړه غونډه
پنجشنبه، ۳ ذوالقعدة ۱۴۴۶ هجري
د سرحدونو، قومونو او قبایلو چارو وزارت د جرګو او همغږۍ مرستیال الحاج مولوي محمد علي جان احمد په مشرۍ، د کورنیو چارو وزارت د استازي الحاج مولوي خلیل الرحمن رحماني او د احصایې او معلوماتو د نفوسو د ثبت رئیس مولوي روح الامين په شتون کې، د فاریاب ولایت د قرمقول ولسوالۍ د میرزامقام کلي د عیدزي او اڅکزي قبیلو د کوچیانو لپاره د تابعیت تذکرو د وېش د ستونزو د حل په موخه، په یاد شوي مرستیال دفتر کې غونډه وشوه.
په لومړي سر کې، محترم احمد کوچیان د هیواد یو شریف او عزتمن قبیله وبلله، او د تابعیت تذکرو ترلاسه کول یې د هیواد د هر فرد یو نه جلا کیدونکی حق وباله. بیا محترم روح الامين د کوچيانو لپاره د تذکرو د وېش پروسې ته اشاره وکړه او ويې ويل: د کوچيانو لپاره د تذکرو د وېش طرزالعمل منظور شوی دی، او د احصایې ملي اداره به د دې طرزالعمل پر بنسټ کوچيانو ته تذکرې وویشي.
د غونډې غړو د یادې سیمې کوچیانو ته د تذکرو د وېش ستونزې د حل موندلو په اړه خپل نظرونه وړاندې کړل. د بحث او نظرونو تبادلې وروسته، د غونډې غړو پریکړه وکړه چې د دې مشکل د حل موندلو لپاره باید بله غونډه جوړه شي، ترڅو وروستۍ پریکړه وشي
