غزني ولايت ته د غصب د مخنيوي کمیسیون یوه پلاوي سفر وکړ
۱۷ رجب ۱۴۴۶
د سرحدونو، قومونو او قبايلو چارو وزارت د سرحدي پلټنو مرستيال او د غصب مخنيوي کمېسيون غړي الحاج مولوي محمد اسماعيل غزنوي د مل پلاوي په مشرۍ غزني ولايت ته د خپل سفر په ترڅ کې د دې ولايت له مرستيال والي الحاج ملا عبدالله حماد د غصب مخنيوي ولايتي ادارې مسؤلينو، رئيسانو او د ولسواليو استازو سره وکتل.
په دغه ليدنه کې ښاغلي غزنوي د ياد ولايت مسؤلين خپلو کارونو ته لا وهڅول او له هغوی يې وغوښتل، چې د ځمکو د غصب مخنيوي موضوع دې د شرعي اصولو مطابق وڅېړل شي، همدا راز امارتي او خصوصي ځمکې دې د ځانګړي طرزالعمل له مخې مشخصې شي. ښاغلي غزنوي وويل: ټولې امارتي ځمکې دې له غصب راوګرځول شي تر څو د کاري فرصتونو پر بنسټ تجارانو او عامو خلکو ته ور کړل شي.
د یادې ناستې پرمهال د غزني ولايتي مسؤلينو او د دغه ولايت د غصب مخنيوي کمېسيون غړو له مرکزي کمېټې سره خپل تر سره کړي فعالیتونه شريک کړل، د ستونزو د حل غوښتنه يې وکړه او مرکزي کميټې ته یې د ګډ کار کولو ډاډ او ژمنتیا څرګنده کړه.
