بلخ ولایت کې د ۳۵ کلونو اوږده دښمني پای ته ورسېده
دوشنبه ۱۴۴۶/۶/۱۴
د بلخ ولايت په چهار بولک ولسوالۍ کې د دوو کورنيو ترمنځ هغه ۳۵ کلنه اوږده دښمني پای ته ورسېده چې يو تن پکې خپل ژوند له لاسه ورکړی و او د ګڼو مالي زيانونو تر څنګ يې لا هم تر منځ ژور تاوتريخوالی او لوی اختلافونه موجود وو.
د ياد ولايت د والي الحاج محمد یوسف وفا، د سرحدونو، قومونو او قبايلو چارو رياست رئيس مولوی سردار محمد محمدي، ځایي علماوو او قومي مشرانو په بيا بيا هلو ځلو لومړی د دغه دواړو کورنيو سره جلا جلا ناستې وشوې او وروسته د جرګې د عادلانه پريکړې له مخې روغې جوړې ته راضي شوې چې په ترڅ کې یې دا د کلونو کلونو دښمنې پای ته وموند.
ښکېلو اړخونو د مسؤلينو د منصفانه پريکړې له مخې يو بل ته په بښنې کولو سره د ا.ا.ا او په خاصه توګه د سرحدونو، قومونو او قبايلو چارو وزارت له مشرانو مننه وکړه، چې په وينا يې د دوی د يادې ۳۵ کلنې دښمنۍ تر څنګ د ولسونو هره لویه او وړه شخړه په سولييزه توګه حل او فصل کړې او هيوادوال يې د خوښۍ په ټغر سره راټول کړي دي.
