په کندز ولايت کې يوه لويه ولسي غونډه تر سره شوه!
چهار شنبه ۲۹/۳/۱۴۴۶
د سرحدونو، قومونو او قبايلو چارو وزارت د یوه لوړ پوړې پلاوي له لوري د اسلامي نظام د ثبات، ولسي یووالي او انسجام غونډه داسې مهال ترسره شوه چې د یاد وزارت د جرګو او قبايلي چارو د همغږۍ معين الحاج مولوي محمد علي جان احمد، د جرګو او قبایلي چارو د همغږۍ رئيس شيخ حضرت ولي حقاني، د شخړو د حل سلاکار مولوي محمد آجان رهبر، د اطلاعاتو اوعامه اړيکو رئيس مفتي تسليم الله حقاني د ولايت مسؤلينو، ولسوالانو او د بيلا بېلو قومونو استازو پکې ګډون کړی وو. پيل د ياد وزارت د اطلاعاتو او عامه اړيکو رئيس مفتي تسليم الله حقاني وکړ نوموړي وويل: د قومونو اتحاد،همغږي او په يوه ټغر راټولول، دهغوی ستونزې اوريدل او د حل په موخه يې کار کول زموږ له لومړيتوبونو څخه دي.
ورپسې د جرګو او قبايلي چارو د همغږۍ معين ښاغلي احمد د کندز د ولسونو اتحاد، ميړانه او جهادي مبارزه وستايله، زياته يې کړه: دې خلکو په پوره اتفاق له موږ سره په کمو امکاناتو لوی دښمن مات کړ، چې دا زموږ د راتلونکي نسلونو لپاره يو درس او افتخار دي. نوموړي د اشغال پر مهال له افغانانو سره د شویو ظلمونو يادونه وکړه ویې ویل، چې په دغه ولايت کې د بي سرحده ډاکټرانو روغتون په بمبار کې د ګڼ شمير خلکو شهيدانېدل یوه نه هيريدونکې غمیزه ده. هغه وويل دا هرڅه تېر شول اوس د وطن او وطنوالو د خدمت وخت دی او موږ به له ولسونو سره په ډاډ دا خدمتونه جاري ساتو.
د جرګو او قبایلي چارو د همغږۍ رئيس شيخ حضرت ولي حقاني وويل: په افغانستان کې د قومونو په لاسونو د امپراطوريو ماتېدل دوه سببه لري لومړی اتحاد او اتفاق دوهم ايمانې او غيرتې جزبه که دا دواړه برخې همداسي وساتو نو هيڅ دښمن به بيا پرموږ زړه ښه نه کړي. ښاغلي حقاني ولسونو ته ډاډ ورکړ چې شته ستونزې به يې د حل په موخه تر لوړ رتبه مسؤلينو رسوي. د شخړو د حل سلاکار مولوي محمد آجان رهبر زياته کړه: شل کلن اشغال زموږ کورونه، مسجدونه او مدرسې ړنګې کړې خلک يې شهيدان کړل کونډې او يتيمان يې را پريښودل، چې نن لله الحمد ا.ا.ا دې هرڅه ته متوجه دی او د ولس هرې ستونزې ته د حل لار لټوي.
قومي سپين ږيرو وويل: نن په هيواد کې امن دی، ازادې ده او د يوه سپین بيرغ تر سيورې لاندي واحده رهبري ده، نو په هغو خلکو غږ کوو چې لايې هم د پخوانيو اشغالګرو لمن نيولې، راشئ د پرديو په تبليغاتو مه غوليږئ او په امن کې ژوند وکړئ. قومي مشرانو زياته کړه موږ دا په اسلامي اصولو او افغاني دودونو برابر نظام په دعاوو غوښتی ټول ولسونه يې ترڅنګ ولاړيو، تري راضي يو او له نړيوالو مو غوښتنه ده، چې په رسميت يې وپيژني.
