په جوزجان، ميدان وردګ، باد غيس او غزني ولايتونو کې بيلا بيلې مرورې کورنۍ پخلا شوې
دوشنبه ۱۲/ ۶/ ۱۴۰۳
د جوزجان ولايت په شير آباد سيمه کې د اچکزيو او عليزيو دوو خيلونو ترمنځ راپورته شوې شخړه د ياد ولايت د سرحدونو، قومونو او قباياو چارو د رئيس غلام نبي صميم په مشرۍ، چې د شخړو حل کميسون په شمول يې ځايي خلکو، علماوو او د ا.ا.ا منسوبينو ملتا کوله حل او دواړه طرفونه سولې ته راضي شول.
په ورته مهال د ميدان وردګ ولايت نرخ ولسوالۍ کې د حسن خيلو کوچيانو د دوو کورنيو ترمنځ د پيسو پر سر راپورته شوی جنجال پاي ته ورسيد. د ياد ولايت د سرحدونو، قومونو او قبايلو چارو آمريت آمر امين الله اخندزاده مل پلاوي سره يادې سيمې ته سفر وکړ او د قومي مشرانو په منځګړيتوب يې دواړه کورنۍ پخلا کړې.
همدا راز د بادغيس په آبکمري ولسوالۍ کې د دوو کورنيو ترمنځ ورته جنجال حل شوی، د ياد ولايت د سرحدونو، قومونو او قبايلو چارو رئيس مولوي محمد قاسم په مشرۍ دغه روغه جوړه وشوه، چې دواړو لوريو يو بل ته بښنه وکړه.
بلخوا د غزني په ناهور ولسوالۍ کې هم د دوو قومونو تر منځ دښمني په دوستۍ بدله شوه، چې د څړځايونو او زراعتي ځمکې پر سر راپورته شوې وه، د دغه ولايت د سرحدونو، قومونو او قبايلو چارو رئيس مولوي جان محمد حاجي مومن د ټاکلي هيئت په شتون کې د طرفينو اسناد وکتل ساحه يې بر رسي کړه او د يوې منصفانه پريکړې له مخې يې دواړه خواوې پخلا کړې.
د سر حدونو، قومونو او قبايلو چارو وزارت د خپلو همکاره ولايتي رياستونو په هلوځلو د هيواد په ګوډ ګوډ کې ولسي شخړو او تاو تريخوالي ته رسيدګي کوي ترڅو ولسونه د سولې په ټغر راټول کړي.
