له کنړ، نورستان، ننګرهار، پکتیا او خوست وروسته په پکتیکا ولایت کې هم د اطرافي ولسوالیو د خلکو د ستونزو د حل کمېټه جوړه شوه.
یادې کمېټې د امیرالمؤمنین حفظه الله تعالی د یوه ځانګړي حکم له مخې د سرحدونو، قومونو او قبایلو چارو د وزیر الحاج ملا نورالله نوري په مشرۍ جوړېږي، چې له کنړ، نورستان، ننګرهار، پکتیا او خوست ولایت وروسته نن په پکتیکا ولایت هم کې د مرستیال والي مولوي عبدالسلام سعادت په مشرۍ له اړوندو ادارو څخه جوړه شوه.
د ناستې په ترڅ کې د کمېټو تر جوړېدو ورسته دوی ته سپارښتنه وشوه چې د تعلیم، روغتیا، مخابراتو، برق او اوبو، سرکونو او نورو برخو کې د اطرافي ولسوالیو د خلکو ستونزې په جدي او شفاف ډول تشخیص کړي او د حل په موخه یې راپور د سرحدونو، قومونو او قبایلو چارو وزارت ته ورکړي.
ښاغلي نوري د خپلو خبرو پر مهال په تېر شل کلن انقلاب کې د پکتیکا ولایت د ولس خدمتونه، جهادونه وستایل او ژمنه یې وکړه چې د پکتیکا ولایت د اطرافي ولسوالیو د خلکو اولویه او ضروري مشکلات به د امیرالمؤمنین حفظه الله تعالی د ځانګړي حکم له مخې تر تشخیص او تثبیت وروسته حل کوي او کارونه به یې پیلوي.
یادې کمېټې به په نورو سرحدي او ډېورنډ فرضي کرښې ته په څېرمه ولایتونو کې هم تر جوړښت وروسته خپل کارونه پیل کړي.
