په بادغیس ولایت کې ۶ کاله وړاندې پېښه شوې شخړه حل شوه
د بادغیس ولایت د سرحدونو، قومونو او قبایلو چارو ریاست د مسؤلینو او د شخړو د حل کمیسیون په هلوځلو یوه شخړه چې شپږ کاله وړاندې پېښه شوې وه او له کبله یې یادې کورنۍ له خورا زیاتو ستونزو سره مخ وې، حل شوه. په دغه شخړه کې ښکېلي دوه کورنۍ چې یو له بل سره یې د خپلوۍ او دوستي روابط لرل، خو د یوې کورنۍ موضوع پر سر یې شپږ کاله مخکې ترمنځ ژور اختلافات رامنځته شوي وو، چې له وجې یې د دواړو کورنیو ترمنځ اړیکې خړې شوې وې. د دغې شخړې د حل په مراسمو کې جرګه کوونکو په یوه لوري ۵ لکه افغانۍ د جریمې په توګه کېښودې او د دوی ترمنځ یې روغه جوړه وکړه. له دغې پرېکړې څخه دواړو لوریو د خوښي په څرګندولو سره ژمنه وکړه چې نور به یو له بل سره د وروڼو په څېر ژوند کوي.
