په غزني او بادغیس ولایتونو کې د څو کورنیو ترمنځ پېښې شوې شخړې په دوستي بدلې شوې
دوشنبه ـ۱/۱/۱۴۴۶
د یادو شخړو له جملې یوه یې په غزني ولایت کې یو کال مخکې د دوو کورنیو ترمنځ د فزیکي برخورد له امله پېښه شوې وه، چې د یاد ولایت د سرحدونو، قومونو او قبایلو چارو ریاست په همغږۍ او د قومي سپین ږیرو په هلوځلو په دوستي بدله شوه. یاده شخړه چې طرفین پکې له مودو راهیسې له ستونزو سره مخ و، د ذکر شوي ولایت د محکمې له لوري یاد ریاست ته سپارل شوې وه، چې د مسؤلو چارواکو او مصلحینو د هڅو له برکته یې دواړه لوري سولې ته راضي شول.
همدارنګه د بادغیس ولایت د آبکمري ولسوالۍ د دوو کورنیو تر منځ د پېښې شوې شخړې د حل په موخه هم د یاد ولایت د سرحدونو، قومونو او قبایلو چارو ریاست د سیمه ییزو مشرانو په همکاري یوه منازعه چې د دوو کلیو د اوسېدونکو ترمنځ یې زیاتې ستونزې را پورته کړې وې، د سیمه ییزو مرکچیانو د هڅو په نتیجه کې یې منازعه حل شوه او روغې جوړې ته یې غاړه کېښوده.
د شخړو د حل په دواړو ناستو کې مسؤلینو او قومي مشرانو له یو بل سره په ګډه همکاري ټینګار کړی او د ولسي وګړو ترمنځ د شخړو حل یې خپل مسؤلیت بللی.
