په کندهار ولایت کې ۷ کلنه شخړه په دوستي بدله شوه
۲۷/۱۰/۱۴۴۵
د کندهار ولایت د اتمې ناحیې اړوند د پوپلزیو او بارکزیو قومونو د دوو کورنیو تر منځ ۷ کاله مخکې راپېښه شوې شخړه، چې له یوه لوري څخه پکې یو کس هم وژل شوی و، تېره ورځ د یاد ولایت د سرحدونو، قومونو او قبایلو چارو د رئیس ملا عبدالباري رحماني، ځینو مسؤلینو او قومي مشرانو په هلوځلو په دوستي بدله شوه. د شخړې د حل په وخت کې قومي مشرانو د موضوع په اړه پوره پلټنه وکړه، له دواړو لوریو څخه یې وکالت خطونه واخیستل او وروسته یې د دوی تر منځ د ښېګڼې او خیر پرېکړه وکړه. یاده پرېکړه د طرفینو د قبول وړ وګرځېده او د مرکې په مخکې یې ژمنه وکړه چې نور به یو له بل سره د وروڼو په څېر ژوند کوي.
