په ننګرهار ولایت کې ۴۷ کلنه شخړه حل شوه
د ننګرهار ولایت د شیخ مل خیل، شینوارو او کوکي خیل، بډخیل افریدو تر منځ د ځمکې پر سر پېښه شوې ۴۷ کلنه شخړه چې له کبله یې دواړو خواوو ته مالي زیانونه اوښتي و، د یاد ولایت د سرحدونو، قومونو او قبایلو چارو د ریاست، قومي مخورو او علماء په منځګړیتوب حل شوه.
د یادې شخړې د هوارولو په موخه مسؤلینو له ښکېلو قومونو سره ناستې تر سره کړې تر څو دواړه لوري دې ته چمتو کړي چې یو بل ته بښنه وکړي او له بدۍ لاس واخلي، چې بالآخره دواړو جهتونو یو بل ته بښنه وکړه او د ورورولۍ په فضاء کې یې د ژوند کولو ډاډ څرګند کړ.
د یادونې وړ ده چې د سرحدونو، قومونو او قبایلو چارو وزارت تل هڅه کوي چې د قومونو تر منځ د کلونو کلونو شخړې حل کړي او تر منځ یې سولییزه فضاء حاکمه کړي.
