په پنچشېر ولایت کې ۴۰ کلنه شخړه حل شوه
۱۶\۷\۱۴۴۵
د پنجشیر ولایت د سرحدونو، قومونو او قبایلو چارو آمریت په ابشار ولسوالۍ کې د دوو قومونو سنګي خیلو او ګلاب خیلو تر منځ ۴۰ کلنه شخړه د یوې قومي جرګې په ترڅ کې حل کړه. د دغې شخړې د حل په وخت کې د یاد آمریت آمر ملا عبد الباسط، علماء کرامو، قومي مشرانو او د ابشار ولسوالۍ مسؤلینو هم ګډون کړی وو.
په پیل کې د یادې ولسوالۍ ولسوال ورغلي پلاوي او میلمنو ته ښه راغلاست ووایه او خلک یې یووالي ته راوبلل، همداراز د یاد آمریت مسؤلینو او علماء کرامو د خبرو پر مهال د اسلام له نظره په پورتنۍ موضوع خپل علمي نظرونه وړاندې کړل او دواړه قومونه یې سولې ته را وبلل.
په پاي کې دواړو قومونو د مسؤلینو په مخ کې یاد پلاوي ته عهد ورکړ چې نور دا شخړه پر دغه ځای پای ته ورسېده او له دې وروسته به په خپل منځ کې هیڅ کومه ستونزه ونه لري او له مسؤلینو څخه یې مننه وکړه چې په یاده موضوع کې له دوی سره پوره همکار شول.
