په بغلان ولایت کې د قومونو تر منځ د همغږۍ غونډه جوړه شوه

دوشنبه١١د ربیع الاول۱۴۴۵

یاده غونډه چې نن له غرمې مخکې په بغلان ولایت کې جوړه شوې وه د سرحدونو، قومونو او قبایلو چارو وزارت د جرګو او قبایلو چارو د همغږۍ معین الحاج ملا عبدالخالق عابد، مل پلاوي او د دغه ولایت له بېلابيلو ولسواليو څخه راغلیو ګڼ شمېر ديني عالمانو، سپين ږيرو او قومي مشرانو پکې ګډون کړی وو. لومړی څو تنو علماوو او قومي مخورو په خپلو خبرو کې پر ټولو قومونو غږ وکړ چې نور د پرديو جاسوسانو په خبرو ونه وغوليږي، پرديو لاسپوڅو تل يو شمير افغانان د قوم او سمت په نومونو تېر اېستلي او د خپلو شخصي ګټو د ترلاسه کولو لپاره یې هر ډول استفاده ترې کړې ده، دوی زیاته کړه چې د اسلامي نظام له قائیمېدو سره سم په ټول هېواد کې د غلا، فساد او بدبختیو مخه نیول شوې ده. د جرګو رئیس شيخ حضرت ولي حقاني د قومونو ترمنځ برتري او امتياز د الله تعالى په دربار کې تقوا ياده کړه ويې ويل چې په کثرت او اقليت سره قومونو ته برتري، فضيلت او امتياز نه ورکول کيږي، بلکې د الله جل جلاله په نزد تقوا دار خلک د امتياز خاوندان دي. په پای کې د وزارت د جرګو او قبايلو چارو د همغږۍ معين الحاج ملا عبدالخالق عابد وویل: افغانستان له نيمې پيړۍ جګړو څخه راوتلی د جوړولو لپاره يې ډير کار او زيار ته اړتيا شته، ا.ا.ا د بيارغونې او اقتصادي ودې لپاره سترې پروژې پيل کړې دي، ولس ته پکار ده چې د پروژو په تطبیق کې له امارت سره همکار پاتې شي او ملاتړ یې وکړي.