پکتيا کې د څلورو کورنيو ترمنځ ۳۵ کلنه بدي په دوستي بدله شوه
شنبه ۲۹ جمادی الآخرة ۱۴۴۷
د پکتیا ولایت د سرحدونو، قومونو او قبایلو چارو ریاست مسؤلینو د قومي مشرانو، علماوو او سیمه ییزو مخورو په همغږۍ د دغه ولايت په څمکنيو ولسوالي کې نېږدې د ۳۵ کلونو په دوام هغه شخړه حل او فصل کړه، چې څلور مختلفې کورنۍ پکې ښکېلې وې.
په ياده رامنځته شوې شخړه کې، چې څلورو تنو خپل ژوند هم بايللی وو او ګڼې ستونزې يې لرلې، د ا.ا.ا مشرانو پکې د روغې جوړې ناستې پيل کړې، د اختلاف د موضوع تر څېړلو وروسته يې د جرګو او دوامدارو هڅو په ترڅ کې دواړه لوري زغم، بښنې او ورورولي ته راوبللې، چې په همدې سره ټولو ښکېلو خواوو د سولې او دوستۍ لاسونه سره ورکړل.
د يادې روغې جوړې پر مهال مسؤلینو ټینګار وکړ، چې د ورته قومي شخړو سوله ییز حل به په راتلونکي کې هم د دوی له لومړیتوبونو وي، څو د ورورولي فضا پیاوړې او د ولس ترمنځ د باور کچه لا نوره هم لوړه شي
