په کاپیسا ولایت کې یوه شپږ کلنه شخړه حل شوه
دوشنبه/۱۹/ رمضان المبارک/ ۱۴۴۴
د سرحدونو، قومونو او قبایلو چارو وزارت اړوند د کاپیسا ولایت د سرحدونو، قومونو او قبایلو چارو امریت او د شخړو د حل کمسیون په همکاري یوه شپږ کلنه شخړه حل او په سوله بدله شوه.
یاده شخړه د کاپیسا ولایت کوهبند ولسوالۍ اړوند په جب درې کلي کې د دوو کورنیو تر منځ د خپل منځي اختلافاتو پر سر را منځ ته شوې وه چې له دواړو لوریو څخه پکې درې تنه هم وژل شوي وو.
په دغه ناسته کې د کاپیسا مرستیال والي مولوي اسدالله سنان، د سرحدونو، قومونو او قبایلو آمر ملا صدیق الله صیاد، د نورو ادارو مسؤلینو، قومي مشرانو او دیني عالمانو ګډون کړی وو.
په پیل کې د سرحدونو، قومونو او قبایلو آمر ښاغلي صیاد ټولو راغلیو ګډونوالو ته هرکلی وکړ او د یادې قضیې په اړه یې معلومات وړاندې کړل.
وروسته مرستیال والي ښاغلي سنان وینا وکړه او ویې ویل: زموږ هیواد له پخوا څخه د جرګو او مرکو کور دی او له دې لارې زموږ د هیواد ډېرې مهمې پریکړې نیول شوې دي.
هغه د یادې شخړې په حل ډېره خوښې وښوده او د یاد آمریت له هلوځلو ستاینه يې وکړه.
ورپسې د علماوو او قومي مشرانو په استازیتوب څو تنو د جرګو، مرکو او سولې په اړه تفصیلي خبرې وکړې.
دوی مرکې د هیوادوالو ترمنځ د بدیو له منځه وړلو یوه ښه طریقه یاده کړه او د روغو جوړو د فضیلت په اړه یې ویناوې وکړې.
د غونډې په اخیر کې د ټاکل شوي هیئت له لوري نیول شوې پرېکړه ټولو ګډونوالو ته واورول شوه او په شخړه کې ښکېل دواړه لوري یې سره غاړه غړۍ کړل.
